2 Raja-raja 21

Iatu Manasye tonna dadi datu sangpulo duamo taunna; ma’parentami dio Yerusalem limangpulo llima taunna. Na iatu indo’na disanga Hefzibah.

Napogau’mi tu apa kadake dio pentiroNa PUANG, susitu penggauran megallianna mintu’ bangsa tu Naula’i PUANG dio mai tingayona to Israel.

Sia napabendan sule tu inan madao, tu mangka nasanggang Hizkia, ambe’na, sia nabangunan Baal tu inan pemalaran sia nagaragai tu lentong kayu di podeata, susi mangka napogau’ Ahab, datu Israel, sia tukku menomba dio tingayona mintu’ ma’dandan maritik dao langi’ sia mengkaola lako.

Sia napabendan duka tu ba’tu pira-pira inan pemalaran dio banuanNa PUANG tu diona a’ganna Napokadamo PUANG Nakua: Lan Yerusalem la Kunii umpaunnisungi tu sangangKu.

Sia napabendanan tu ba’tu pira-pira inan pemalaran tu mintu’ ma’dandan maritik dao langi’ lan da’dua tarampak banuanNa PUANG.

Ondong pissanpi api napamaindananni tu anakna muane, sia umpalalo balik mata sia kapakita-kitan sia napaden tu to untambai bombo to mate sia deata masussuk. Sia buda napogau’ tu apa kadake dio pentiroNa PUANG, tu umpa’dikki penaanNa.

Napabendan duka tu misa’ rapang-rapang dipodeatanna Asyera, tu mangka nagaragai, lan banua, tu mangka Napokada PUANG a’ganna lako Daud sia lako Salomo, anakna muane, Nakua: Lan te banua indete Yerusalem, tu Kupilei langsa’ dio mai mintu’ sukunna to Israel, la Kunii umpaunnisung sangangKu tontong sae lakona.

Tae’mo Kula umpatengkai tu lette’na to Israel lan mai tondok tu mangka Kukamasean nene’ to dolona, podo ke nakaritutui tu mintu’ apa Kupasan lako sia mintu’ sukaran aluk tu mangka napasan Musa, taungKu, lako tau iato mai.

Apa tae’ naperangii tau iato mai, belanna napapusa Manasye, naurunganni umpogau’i tu apa mandu kadake na penggauranna mintu’ bangsa, tu Nasabu’i PUANG dio tingayona to Israel.

Iamoto Nama’kada tu PUANG nalopian mintu’ taunNa, iamotu mai nabi, nakua:

Belanna napogau’mo Manasye, datu Yehuda, te penggauran megallian iate, napogau’ tu apa mandu kadake na iatu mintu’ apa napogau’ to Amori tu dolo na ia; sia nasuapa tu to Yehuda umpogau’ kasalan diona kaumpenombaianna deatanna.

Iamoto, inde sia tu kadanNa PUANG, Kapenombanna to Israel, Nakua: Manassa la Kuparampoi kamandasan tu Yerusalem sia to Yehuda, na tilanta’ lan talinga duanna tu mintu’ to urrangii.

Sia la Kupae’te’i ulang pesuka’ tu Yerusalem, susitu mangka Kue’teran Samaria sia batu petimbang, susitu mangka Kue’teran bati’na Ahab, sia la Kupa’dii tu Yerusalem susito umpa’dii kandian; ke mangkami dipa’dii, nabaliangan lenmi tau.

Sia la Kutibe tu taan mana’Ku, tu torronapa, sia la Kusorong tama kuasanna mintu’ ualinna, naurunganni dadi pangrampa sia nasialai mintu’ ualinna.

Belanna napogau’mo tau iato mai tu apa kadake dio pentiroKu sia tontong umpa’dikki penaangKu randuk dio mai allo katassuranna nene’ to dolona lan mai tondok Mesir sae lako allo iate.

Sia ia duka tu Manasye umpatibollo buda rarana to tang sala tu naponnoan Yerusalem randuk dio mai biringna sae lako biring sangbalinna, senga’pito tu mintu’ kasalan tu nasua tu to Yehuda umpogau’i, napobannang umpogau’i tu apa kadake dio pentiroNa PUANG.

Iatu tang dipokadannapa tu mintu’ tuna’na Manasye, sia mintu’ apa napogau’ sia mintu’ kasalan napogau’, tang tisura’moraka lan sura’ ossoranna mintu’ datu to Yehuda?

Iatu Manasye tamamo batu dilobang dipasola nene’ to dolona, sia dipeliang dio pa’lak naala lili’ banuanna, iamotu pa’lakna Uza; anna Amon, anakna muane, ussondai dadi datu.

Iatu Amon tonna dadi datu duangpulomo ndua taunna; ma’parentami dio Yerusalem duang taun. Na iatu indo’na disanga Mesulemet, anakna Harus, dio mai Yotba.

Napogau’mi tu apa kadake dio pentiroNa PUANG, susitu napogau’ Manasye ambe’na.

Naturu’mi datu tu mintu’ bate lalanna ambe’na, sia mengkaola lako rapang-rapang dipodeata tu napengkaolai ambe’na sia tukku menomba dio tingayona.

Naboko’imo tu PUANG, Kapenombanna nene’ to dolona, sia tae’ naturu’ lalanNa PUANG.

Sipakulu-kulumi tu to mase’ponna Amon unneai, anna patei tu datu lan tongkonan layukna.

Apa napatei pa’tondokan tu mintu’ to sipakulu-kulumo unnea datu Amon. Anna angka’i pa’tondokan tu Yosia, anakna muane, ussondai dadi datu.

Iatu tang dipokadannapa tu mintu’ tuna’na Amon, sia mintu’ apa napogau’, tang tisura’moraka lan sura’ ossoranna mintu’ datu to Yehuda?

Napeliangmi tau tu datu lan liangna dio pa’lakna Uza; anna Yosia, anakna muane, ussondai dadi datu.